యిదంతా?!
ఒళ్లంతా మోహనరాగాలేవో
అల్లుకుంటోన్న అలికిడి
నిశీధి ప్రాంగణంలో సంధ్యారాగాలేవో
కరిగిపోతోన్న కలకలం
-యిది కవిత్వమేనా?
వూబిలా నన్ను లాక్కునేది?
ప్రవాహాలేవో నన్ను చుట్టేస్తో వురకలెత్తుతున్నాయ్
శ్వాస సుగంధమై ప్రాణం పరిమళమవుతోంది
వ్యాకులతా పుష్పాలన్నీ
వొక్కొక్కటీ రాలుతోన్న చప్పుళ్లు
చీకట్లోని అగాధంలా యేదో
అనంతాన్ని సూచిస్తోంది
నిశ్చబ్దం శబ్దమవుతోన్న వేళ
-యిది
ఆనందం
అలౌకికం
విశ్వజనీనం
కవిత్వమేనా యిదంతా?!
Post a Comment